อุปกฺขตํ ปริโภคนฺตรายํ กเรยฺย ตสฺส มุทฺธา ผเลยฺย สตธา วาสหสฺสธา วา ฯ
จตฺตารีมานิ มหาราช ตถาคตสฺส เกหิจิ อนาวรณียานิ ฐานานิ ฯ กตมานิ
จตฺตาริ ฯ ลาโภ โข มหาราช ภควโต นิยโต อุทฺทิสฺสกโต อุปกฺขโต น สกฺกา
เกหิจิ อนฺตรายํ กาตุํ ฯ สรีรานุคตา มหาราช ภควโต พฺยามปปภา น สกฺกา เกหิจิ
อนฺตรายํ กาตุํ ฯ สพฺพญฺญุตํ มหาราช ภควโต ญาณรตนํ น สกฺกา เกหิจิ อนฺตรายํ
กาตุํ ฯ ชีวิตํ มหาราช ภควโต น สกฺกา เกหิจิ อนฺตรายํ กาตุํ ฯ สพฺพานิปิ เอกรสานิ
อโรคานิ อกุปฺปานิ อฏฺฐานานิ อปโรปกฺกมานิ อผุสฺสานิ กิริยานิ ฯ อทสฺสเนน มหาราช
มาโร ปาปิมา นิลียิตฺวา ปญฺจสาลเก พฺราหฺมณคหปติเก อนฺวาวิสิ ฯ ยถา มหาราช
อิตฺถี สปติกา นิลียิตฺวา ปรปุริสํ เสวติ ฯ เอวเมว โข มหาราช มาโร ปาปิมา นิลียิตฺวา
ปญฺจสาลเก พฺราหฺมณคหปติเก อนฺวาวิสิ ฯ ยทิ มหาราช อิตฺถี สามิกสฺส สมฺมุขา
ปรปุริสํ เสเวยฺย อปิ นุ โข สา อิตฺถี โสตฺถึ ลเภยฺยาติ ฯ น หิ ภนฺเต หเนยฺยาปิ
ตํ ภนฺเต ทิสฺวา สามิโก วเธยฺยาปิ พนฺเธยฺยาปิ ทาสตฺตํ อุปเนยฺยาติ ฯ เอวเมว
โข มหาราช มาโร ปาปิมา นิลียิตฺวา ปญฺจสาลเก พฺราหฺมณคหปติเก อนฺวาวิสิ ยทิ
มหาราช มาโร ปาปิมา ภควโต อุทฺทิสฺสกตํ อุปกฺขตํ ปริโภคํ อนฺตรายํ กเรยฺย ถูสมุฏฺฐิ
วิย มาโร ปาปิมา วิกิเรยฺย สตธา วา สกสฺสธา วา ตสฺส สีสํ ผเลยฺย ฯ ยถา
วา ปน มหาราช รญฺโญ ปจฺจนฺติเม ปเทเส วิสเม โจรา นิลียิตฺวา ปณฺฐํ ทุสฺสนฺติ
ยทิ ราชา ตํ โจรํ ปสฺเสยฺย ตสฺส สีสํ ผรสุนา ผาเลยฺย สตธา วา สหสฺสธา
วา ฯ เอวเมว โข มหาราช มาโร ปาปิมา นิลียิตฺวา ปญฺจสาลเก พฺราหฺมณคหปติเก
อนฺวาวิสิ ยทิ มหาราช มาโร ปาปิมา ภควโต อุทฺทิสฺสกตํ อนฺตรายํ กเรยฺย ถูสมุฏฺฐิ
วิย มาโร ปาปิมา วิกิเรยฺย สตา วา สหสฺสธา วา ตสฺส สีสํ ผเลยฺยาติ ฯ เอวเมว
โข ภนฺเต นาคเสน โจริยกมฺมํ กตํ มาเรน ปาปิเมน นิลียิตฺวา ปญฺจสาลเก
พฺราหฺมณคหปติเก อนฺวาวิสิตฺวา ฯ สเจ โส ภนฺเต นาคเสน มาโร ปาปิมา ภควโต
อุทฺทิสฺสกตํ ปริโภคํ อุปกฺขตํ อนฺตรายํ กเรยฺย ตสฺส สีสํ ผเลยฺย สตธา วา สหสฺสธา
วา กาโย ตสฺส ถูสมุฏฺฐิ วิย วิกิเรยฺยาติ ฯ

ภควโต ลาภนฺตรายญฺโห ปญฺจโม ฯ

ภนฺเต นาคเสน ตุมฺเห ภณถ ตถาคโต สพฺเพสํ สตฺตานํ อหิตมหเนตฺวา
หิตมุปทหตีติ ปุน จ ภณถ อคฺคิกฺขนฺธูปเม ธมฺมปริยาเย เทสิยมาเน สฏฺฐิภิกฺขูนํ อนุปาทาย

อาสเวหิ จิตฺตานิ วิมุจฺจึสุ สฏฺฐิภิกฺขู สิกฺขํ ปจฺจกฺขาย หีนาย อาวตฺตึสุ สฏฺฐิภิกฺขูนํ
อุณฺหํ โลหิตํ มุขโต อุคฺคตนฺติ ฯ ยทิ ภนฺเต นาคเสน ตถาคโต สพฺพสตฺตานํ อหิตมปเนตฺวา
หิตมุปทหตีติ เตนหิ อคฺคิกฺขนฺธูปเม ธมฺมปริยาเย เทสิยมาเน สฏฺฐิภิกฺขูนํ อุณฺหํ โลหิตํ
มุขโต อุคฺคตนฺติ ยํ วจนํ ตํ มิจฺฉา ฯ ยทิ อคฺคิกฺขนฺธูปเม ธมฺมปริยาเย เทสิยมาเน
สฏฺฐิภิกฺขูนํ อุณฺฆํ โลหิตํ มุขโต อุคฺคตํ เตนหิ ตถาคโต สพฺพสตฺตานํ อหิตมปเนตฺวา
หิตมุปทหตีติ ยํ วจนํ ตํ มิจฺฉา ฯ อยํ อุภโต โกฏิโก ปญฺโห สุมหนฺโต สุคมฺภีโร
ตวานุปฺปตฺโตติ ฯ
ตถาคโต มหาราช สพฺพสตฺตานํ อหิตมปเนตฺวา หิตมุปทหติ อคฺคิกฺขนฺธูปเม
ธมฺมปริยาย เทสิยมาเน สฏฺฐิภิกฺขูนํ อุณฺหํ โลหิตํ มุขโต อุคฺคตํ ตญฺจ ปน ตถาคตสฺส
น วิเหสาย เตสญฺเญว อตฺตโน กิริเยนาติ ฯ เตเนตํ ภนฺเต นาคเสน การณญฺจ น
เจโส อตฺโถ ยทิ ภนฺเต นาคเสน ตถาคโต อคฺคิกฺขนฺธูปมํ ธมฺมปริยายํ น ภเณยฺย
เอตํ อสุตฺวา อปิ น เตสํ อุณฺหํ โลหิตํ มุขโต อุคฺคจฺเฉยฺยาติ ฯ น หิ มหาราช
มิจฺฉาปฏิปนฺนานํ ตถาคตสฺส ธมฺมํ สุตฺวา ปริฬาโห กายสฺมึ โอกฺกมติ เตน เตสํ ปริฬาเหน
อุณฺหํ โลหิตํ มุขโต อุคฺคตนฺติ ฯ เตน หิ ภนฺเต นาคเสน การเณน ตถาคโตเยว
ตตฺถ อธิกาโร โหติ เตสํ นาสนาย ฯ ยถา นาม ภนฺเต นาเคสน อหิ วมฺมิกํ ปวิเสยฺย
อถ อญฺญตโร ปํสุกาโม ปุริโส วมฺมิกํ ภินฺทิตฺวา ปํสุํ หเรยฺย ปํสุหรเณน ตสฺส วมฺมิกสฺส
สุสิรํ ปทเหยฺย ตตฺเถว โส อสฺสาสํ อลภนฺโต มเรยฺย ฯ นนุ โส ภนฺเต อหิ ตสฺส
ปุริสสฺส วิเหสาย มรณํ ปตฺโตติ ฯ อาม มหาราชาติ ฯ เอวเมว โข ภนฺเต นาคเสน
ตถาคโตเยว ตตฺถ อธิกาโร โหติ เตสํ นาสนายาติ ฯ ตถาคโต มหาราช ธมฺมํ เทสยมาโน
อนุนยปฏีฆํ น กโรติ อนุนยปฏีฆวิปฺปยุตฺโต ธมฺมํ เทเสติ ฯ ตถาคตสฺส มหาราช ธมฺเม
เทสิยมาเนเยว ตตฺถ เย สมฺมาปฏิปนฺนา เต พุชฺฌนฺติ เย จ มิจฺฉาปฏิปนฺนา เต
ปตนฺติ ฯ ยถา มหาราช ปุริโส อมฺพํ วา ชมฺพุํ วา มธุกํ วา สผลํ ปาลยมาโน
ยานิ ตตฺถ ผลานิ สารวนฺตานิ ทฬฺหพนฺธนานิ ตตฺเถว อจฺจุตานิ ติฏฺฐนฺติ ยานิ ตานิ
ปน ผลานิ ปูติวณฺฑมูลานิ ทุพฺพนฺธนานิ ปตนฺติ เอวเมว โข มหาราช ตถาคโต ยถาสภาวํ
ธมฺมวีถิยา ธมฺมกถํ เทเสติ เอวํ ธมฺเม เทสิยมาเน เย จ ตตฺถ สมฺมาปฏิปนฺนา เต
พุชฺฌนฺติ เย ตตฺถ ปน มิจฺฉาปฏิปนฺนา เต ปตนฺติ ฯ ยถา วา ปน มหาราช กสกา
ธญฺญํ โรเปตุกามา เขตฺตํ กสนฺติ เตสํ กสนฺตานํ อเนกสสฺสานิ ติณานิ มรนฺติ

เอวเมว โข มหาราช ตถาคโต ปริปกฺกมานเส สตฺเต โพเธตุํ ธมฺมกถํ กโรติ เอวํ
ธมฺเม เทสิยมาเน เย ตตฺถ สมฺมาปฏิปนฺนา เต พุชฺฌนฺติ เย มิจฺฉาปฏิปนฺนา เต
ติณานิ วิย มรนฺติ ฯ ยถา วา ปน มหาราช มนุสฺสา รสเหตุ ยนฺเต อุจฺฉุํ
ปีฬยมานา เย จ ตตฺถ ยนฺตมุขคตา กิมโย เตปิ มรนฺติ เอวเมว โข มหาราช ตถาคโต
ปริปกฺกมานเส สตฺเต โพเธตุํ ธมฺมยนฺตํ อภิปีฬยติ เย ตตฺถ มิจฺฉาปฏิปนฺนา
เต กิมโย วิย มรนฺตีติ ฯ นนุ เต สฏฺฐภิกฺขู ภนฺเต นาคเสน ตาย ธมฺมเทสนาย
ปตนฺตีติ ฯ อาม มหาราช อปิ นุ โข มหาราช ตจฺฉโก รุกฺขํ ตจฺฉนฺโต อุชุกํ ปริสุทฺธํ
กโรตีติ ฯ อาม ภนฺเต สพฺพนฺตํ วชฺชนียํ รุกฺขํ อปนตฺวา เอวมิมํ ตจฺฉโก อุชุกํปิ
ปริสุทฺธํ กโรตีติ ฯ เอวเมว โข มหาราช ตถาคโต ปริสํ รกฺขนฺโต น สกฺโกติ อโพธนีเย
สตฺเต โพเธตุํ มิจฺฉาปฏิปนฺเน สตฺเต อปเนตฺวา อิเม สตฺเต โพธนีเย โพเธติ ฯ เต
ปน มิจฺฉาปฏิปนฺนา อตฺตนา กเตเนว ปตนฺติ ฯ ยถา วา ปน มหาราช โจโร อตฺตนา
กเตน อกฺขิอุปฺปาฏนํ สูลาโรปนํ หตฺถปาทจฺเฉทนํ สีสจฺเฉทนญฺจ ปาปุณาติ เอวเมว โข
มหาราช เย เต มิจฺฉปฏิปนฺนา อตฺตนา กเตน เต ชินสาสนาว ปตนฺติ ฯ ยถา
วา ปน มหาราช กทฺทลิ เวฬุ อสฺสตรี อตฺตเชน ผเลน ปนนฺติ เอวเมว โข มหาราช
เย เต มิจฺฉาปฏิปนฺนา อตฺตนา กเตน เต ชินสาสนาว ปตนฺติ ฯ เยสํ มหาราช
สฏฺฐิภิกฺขูนํ อุณฺหํ โลหิตํ มุขโต อุคฺคตํ เตสํ เนว ภควโต กิริยาย น จ ปเรสํ กิริยาย
อถโข อตฺตโนเยว กิริยาย เตสํ อุณฺหํ โลหิตํ มุขโต อุคฺคตํ ฯ ยถา วา ปน มหาราช
ปุริโส สพฺพชนสฺส อมตํ ทเทยฺย เต สพฺเพ ชนา อมตํ อสิตฺวา อโรคา ทีฆายุกา
สพฺพีติยา จ มุจฺเจยฺยุํ อปิจ โข เอโก ภาโค อโรโค ทีฆายุโก ภเวยฺย เอโก ภาโค
เตน ทุรุปจาเรน มรณํ ปาปุเณยฺย ฯ อปิ นุ โข มหาราช โส ปุริโส ตโตนิทานํ
กิญฺจิ อปุญฺญํ อาปชฺเชยฺยาติ ฯ น หิ ภนฺเตติ ฯ เอวเมว โข มหาราช
ตถาคโต ทสสหสฺสมฺหิ เทวเก โลเก อมตํ ธมฺมทานํ เทติ เย จ ปน ภพฺพา
ธมฺมา มเตน เตปิ พุชฺฌนฺติ เย จ ปน อภพฺพา ธมฺมามเตน เตเยว ปตนฺติ ฯ
เต ตํ อมตํ ธมฺมํ สุตฺวา ปตนฺติ สามญฺญา อมตํ อาสิญฺจิตฺวา วิย ปตฺตาติ ฯ
โภชนํ มหาราช สพฺเพสํ สตฺตานํ ชีวิตํ รกฺขติ ฯ ตเมกจฺโจ ภุญชิตฺวา วิสูจิกาย
มรติ น จ ตตฺถ กิญฺจิ ทายโก อปุญฺญํ อาปชฺชตีติ ฯ สาธุ ภนฺเต นาคเสน ตถา
สมฺปฏิจฺฉามีติ ฯ

ตถาคตสฺส สพฺพสตฺตานํ หิตจรณปญฺโห ฉฏฺโฐ ฯ